Novo Cabo Fisterra 3. Ciencias sociais, xeografía

Para o estudo da xeografía humana e económica é importante coñecer o medio físico onde actúan os grupos humanos. Forma parte do medio físico o relevo dos continentes e tamén os océanos e mares que os bañan, que ademais de modelaren as súas costas formando praias, acantilados ou cantís, golfos…, separan ou unen territorios. [...]

O conxunto do noso planeta atópase dividido nunha serie de zonas climáticas que presentan unhas características térmicas, pluviométricas e de vexetación determinadas. O cambio dunha zona climática a outra depende basicamente da latitude, pero tamén influén a altitude e a acción do mar. [...]

Desde hai tan só unhas décadas, e grazas ás imaxes e aos datos que se obtiveron cos satélites artificiais, o ser humano puido coñecer o complexo e, ao mesmo tempo, limitado que é o planeta Terra e cales son os impactos ambientais que se están a producir nel. [...]

A xeografía política ou xeopolítica estuda como se organiza a sociedade no espazo. O Estado foi a organización básica desde hai moitos anos, e hoxe continúa a ser unha institución imprescindible, pero en transformación. O Estado tradicional caracterízase pola súa soberanía no económico, no político e no cultural. Esta soberanía pódea exercer de xeito democrático ou non democrático. [...]

En 1957, coa sinatura do Tratado de Roma, creouse a Comunidade Económica Europea (CEE) formada por Alemaña, Francia, Italia, Bélxica, Países Baixos e Luxemburgo. O seu obxectivo era crear unha unión de alfándegas que permitise a libre circulación de mercadorías, persoas, capitais e servizos entre os países membros, así como a coordinación de políticas agrícolas, comerciais e de transportes comúns. [...]

A Constitución española, aprobada o 6 de decembro de 1978, regula os aspectos máis importantes do sistema político actual e é a norma suprema que todos os cidadáns e cidadás e todos os gobernantes deben acatar. Algúns dos principais aspectos que regula a Constitución son: Os dereitos e deberes dos cidadáns e das cidadás. A organización do poder do Estado. As relacións entre o poder do Estado e os cidadáns e cidadás. [...]

Todas as cousas que consumimos son produto do traballo humano. As casas que habitamos, a comida coa que nos alimentamos, os vestidos que usamos, os servizos dos que gozamos..., son resultado das diversas actividades realizadas por homes e mulleres. O conxunto de labores destinados á obtención de bens ou servizos para satisfacer as necesidades do ser humano é o que coñecemos como actividade económica. [...]

A agricultura, a gandaría, a pesca e mais a explotación forestal son actividades económicas que forman parte do sector primario. As actividades primarias evolucionaron moito ao longo do tempo. Hoxe presentan unha gran diversidade e desigualdade entre lugares e países. [...]

As actividades baseadas na extracción e na transformación de materias primas noutros produtos agrúpanse, tradicionalmente, no sector secundario que abrangue a minaría, a produción de enerxía, a industria e a construción. As actividades industriais foron cambiando segundo se foron aplicando novas técnicas e se contou con enerxía suficiente, con comunicacións doadas e cun mercado para vender os seus produtos. [...]

Dos tres sectores económicos, o terciario ou de servizos foi o último en se desenvolver, mais, á vez, é o que adquiriu maior importancia, sobre todo nos países ricos, ata o punto de que o seu valor é un destacado indicador para coñecer o grao de desenvolvemento e o nivel de vida dun país. Este sector inclúe actividades tan diversas como: o comercio, o transporte, o turismo, a educación, a sanidade... [...]

España forma parte do grupo de países que integran a Unión Europea (UE). O esforzo da economía española por achegarse ás cifras europeas foi o gran reto da democracia e da política económica do noso país. No entanto, España era un dos países da UE que tiña a renda máis baixa e, por iso, desde o seu ingreso na Unión recibiu moita axuda económica, a cal contribuíu de xeito prioritario ao desenvolvemento das rexións menos prósperas. [...]

A economía galega caracterízase pola importancia que aínda mantén o sector primario. Dentro deste sector salientan a gandaría e, sobre todo, a pesca, fonte de riqueza fundamental para a Comunidade polos postos de traballo que crea tanto dentro da propia actividade pesqueira coma na industria conserveira. Polo xeral, a industria medrou a partir de 1996 coa aparición de novos sectores. [...]

Durante milleiros de anos, o habitual foi nacer, vivir e morrer nun mesmo lugar. Cada pobo ou país vivía dos recursos naturais da súa redonda. Raramente os habitantes dun territorio coñecían como eran e que facían os pobos máis remotos. Na actualidade, pola contra, predomina unha economía global, capitalista e de mercado, que implica unha rede de intercambios de mercadorías, de información e de capitais que afecta o mundo enteiro. [...]

A organización actual do territorio mundial está condicionada pola globalización, un fenómeno esencialmente urbano xa que é nas cidades onde ten lugar a meirande parte das súas manifestacións. A través da globalización, o proceso de urbanización deixou de ser unha simple concentración de poboación, para se converter tamén nun proceso de transformación cultural, política e económica. [...]

A característica máis salientada da poboación é o seu dinamismo: diversos factores, como a natalidade, a mortalidade e as migracións, influíron na súa evolución ao longo da historia. Pero nestes últimos anos, o fenómeno das migracións é o factor máis decisivo. A razón dos fenómenos migratorios derívase das desigualdades que hai entre os países do mundo ou das que existen dentro dun mesmo país. [...]